Húnabyggð leiðandi sveitarfélag í félagsþjónustu

Byggðasamlagi Félags- og skólaþjónustu A- Hún. hefur verið slitið og Húnabyggð tekið við leiðandi hlutverki í félagsþjónustu fyrir íbúa Húnabyggðar og Skagastrandar.

Í kjölfar samþykkta sveitarstjórna Húnabyggðar og Skagastrandar og staðfestingar félags- og húsnæðismálaráðuneytisins hefur byggðasamlagi Félags- og skólaþjónustu A-Hún. verið formlega slitið. Samhliða því hefur verið undirritaður samningur þar sem Húnabyggð tekur við hlutverki leiðandi sveitarfélags í félagsþjónustu fyrir íbúa beggja sveitarfélaga. Samningurinn er gerður á grundvelli 96. gr. sveitarstjórnarlaga og tekur til almennrar félagsþjónustu samkvæmt lögum nr. 40/1991. Með samningnum annast Húnabyggð framkvæmd þjónustunnar, þar á meðal félagslega ráðgjöf, fjárhagsaðstoð, stuðningsþjónustu, málefni aldraðra og húsnæðismál.  

Þjónustan verður veitt á jafnræðisgrundvelli og byggir á mati á þjónustuþörf. Íbúar beggja sveitarfélaga geta leitað til félagsþjónustu Húnabyggðar á meginstarfsstöð í Húnabyggð, símleiðis og með því að senda tölvupóst.

Markmið breytingarinnar er að tryggja samþætta og heildstæða félagslega þjónustu, stuðla að hagræðingu í rekstri og styrkja faglegt samstarf sveitarfélaganna. Sveitarfélagið Skagaströnd mun áfram taka þátt í stefnumótun og samráði um þjónustuna í gegnum áheyrnarfulltrúa í velferðarnefnd Húnabyggðar og með reglulegum samráðsfundum.

 Málaflokki fræðsluþjónustu verður sinnt af hvoru sveitarfélagi fyrir sig.

 Barnaverndarþjónusta fyrir Húnabyggð og Skagaströnd er áfram veitt í sameiginlegu samstarfi sveitarfélaganna innan Barnaverndarþjónustu Mið-Norðurlands með Skagafjörð sem leiðandi sveitarfélag.

 Þjónusta við fatlað fólk er áfram veitt í sameiginlegu samstarfi sveitarfélaga á Norðurlandi vestra með Skagafjörð sem leiðandi sveitarfélagi.

 Hvað þýðir þetta fyrir mig sem þjónustuþega?

• Þú heldur áfram að fá þjónustu líkt og áður – t.d. félagslega ráðgjöf, fjárhagsaðstoð og stuðning samkvæmt mati á þjónustuþörf.
• Þjónustan er nú veitt af félagsþjónustu Húnabyggðar, en hún er fyrir íbúa beggja sveitarfélaga.
• Þú getur haft samband við félagsþjónustu í gegnum síma, tölvupóst eða með því að mæta á starfsstöð í Húnabyggð.
• Ef þörf er á, getur starfsmaður einnig komið til Skagastrandar.

• Þjónustan verður áfram veitt á jafnræðisgrundvelli og með virðingu fyrir þínum þörfum.
• Þú þarft ekki að gera neinar breytingar sjálf/ur/t – við höldum utan um öll mál og tryggjum áframhaldandi þjónustu.
• Ef þú ert í þjónustu nú þegar, heldur hún áfram án truflana.

 Málaflokkar Velferðarsviðs Húnabyggðar eru:

•  Félagsleg ráðgjöf
• Fjárhagsaðstoð
• Stuðningsþjónusta
• Málefni aldraðra
• Húsnæðismál og sérstakar húsnæðisbætur
• Málefni einstaklinga með áfengis- og/eða vímuefnavanda
• Málefni innflytjenda

Starfsfólk Velferðarsviðs Húnabyggðar:

Sara Lind Kristjánsdóttir Félagsmálastjóri sara@felahun.is

Ásta Þórisdóttir ráðgjafi  asta@felahun.is

Sigrún Líndal Þrastardóttir ráðgjafi sigrun@felahun.is

Valgerður Hilmarsdóttir ráðgjafi valgerdur@felahun.is  

 - - - - - - - - - - - - - - - - - - - - - - - - - - - - - - - - - - - - - - - - - - - -

Velferðarsvið Húnabyggðar

Húsnæði HSN, Flúðabakka 2

Sími: 455- 4170